The Sky Bar (Closed)

年尾係不停約朋友仔聚下的季節，今次同朋友一行4人到銅鑼灣Sky Bar享受海鮮西餐。見到Openrice有好多人都食呢個超抵食的Special Menu，每個餐都會包餐湯、12件的生蠔/生和牛/海膽為前菜，再可以6選1的主菜，再加甜品及飲品(可選紅酒/白酒)。4份餐中，我們揀左1份即開生蠔，肉唔算太厚，新鮮度尚可，肉都幾甜。呢個日本和牛刺身又幾有驚喜喎！需然有少少雪味，不過個厚薄同口感又唔錯。至於海膽青瓜新鮮度一半半，不過味道就幾鮮甜。另外，餐廳會比埋小紫菜比大家包住黎食，好甜心。到主菜係我叫的黑松露飯配香煎鱈魚。意大利飯夠香夠creamy，鱈魚煎得香口，不過有DD乾。豬手係我有少少失望的，外皮唔夠脆同唔夠乾身。不過肉就整得夠入味同淋身。朋友仔想試試烤龍蝦蟹肉蕃茄闊麵，所以都叫左一份share。麵質煮到剛剛好，仲吸食左D汁的精華。有半邊龍蝦肉，加上拌麵的蟹肉，令到成碟麵都好鮮。安格斯西冷扒煎得都幾香，牛味都幾重，仲幾嫩tim！今日的甜品係黑森林蛋糕，蛋糕唔算好甜，不過蛋糕唔多夠Moist，不過整體唔算差。以銅鑼灣每人$298+10%食到生蠔、和牛刺身、海膽，再加上不錯的主菜都算幾抵食。