古月

Open Now

Now Closed

之前都有提過北角呢條巷仔有好多唔同嘅食店，有新開嘅，都有開咗好耐，不過越嚟越開得多，所以呢條街就越來越旺，上次試完青藏牛肉麵，今次就試吓呢一間古月。其實今日去食嘢嗰陣時候個肚仔有啲唔係好舒服，都唔知食啲乜野好，就想食啲青青地嘅粉面，見到佢有一個招牌嘅肉骨茶可以配米粉，所以就揀咗呢一個。肉骨茶同埋米粉係分開上嘅，呢種肉骨茶係屬於清淡嘅類型，而唔係好濃味嗰隻，一碗大概有4舊肉，有半肥瘦亦都有骨嘅部位。另外佢嘅特點就係有一舊好大嘅蒜頭，初頭諗唔到點食，估唔到咬落去啲蒜頭肉就燒左出嚟，好得意，食落去一啖蒜頭一啖米粉咁樣，個感覺都幾好。再講一講個湯嘅味道啦，個湯嘅味道有肉味，同埋濃胡椒味，飲落去有少少辣辣地，但係嗰種辣唔係刺激嘅感覺，而係有啲暖胃感，整個感覺都好舒服。另外佢個餐仲可以加兩蚊配一杯熱飲，我就選左個馬來西亞拉茶，呢個拉茶好有馬來西亞嘅風味，而且呢度仲可以揀斑斕味道。雖然飲落去就唔太覺得有斑斕味，斑斕應該就係粉狀，加左喺奶茶上面，所以一入口就有少少甜甜地嘅感覺。呢度嘅嘢食幾好，款又多，而且係特別。另外仲見到有一啲馬來西亞嘅辣拌麵，雞飯，可惜我今日就試唔到，下次一定要再過嚟試吓先。