龍城冰室

Open Now

Now Closed

今日去開觀塘，決定係個度解決埋個晚餐，好耐無食過茶餐廳嘅晚餐，決定食龍城冰室。冰室外面好金壁輝煌，遠距離都望度。店內每張檯都好闊落，坐得好舒服。環境都好乾淨。今日叫左個招牌鮑魚帶子炒飯，見到餐牌有推介，所以決定試下，一送到黎，個窩就滋滋聲仲傳出陣陣飯香， 個炒飯有三隻飽魚同三隻帶子，料都算係咁，$7x都可接受，炒飯底有好多椰菜、蔥同蛋，材料雖然好簡單，但佢炒得好有鑊氣，非常乾身，飯粒粒分明，調味剛剛好，個窩仲好好keep 到d 炒飯夠熱，同埋仲有窩巴，個飯雖然簡單但超好味，好快就比我地清曬。蕃茄焗豬排飯好濃郁嘅蕃茄味，超多芝士，仲有拉絲，豬排好淋都算多，足足有5大舊，除左豬排，仲有勁多四芹菠蘿同菇，味道仲好過大快活嘅焗豬，唔錯。今日個焗豬係晚餐，所以叫左個周打蜆湯，個湯好creamy, 仲有好多料，個湯應該係自己煲而唔係罐頭，味道唔錯。茶餐廳招牌配角，凍檸茶，無得輸，好味。除左我叫呢2樣，餐廳仲有好多選擇，試幾次都唔厭。