喜記路邊雞

Open Now

Now Closed

又到打風嘅日子，唔想煮要落街食，就著街坊裝踢對拖搵食。行到砵蘭街，聽到喜記路邊雞鑊氣「hur hur」聲又多食客，就入去啦。【紅燒脆皮乳鴿$48】乳鴿皮香脆，一咬落去就食到油香，熱辣辣肉嫩滑，真心正！【粉葛鯪魚煲豬什湯(2-3位用)$138】廣東菜中嘅「名湯」，有舒筋活絡袪濕功效。去茶餐廳食有時會有呢個例湯，但味精多偏鹹，呢度就飲唔到味精味，仲有啲鮮甜添。另外湯料都好多，真材實料。必點！【豉椒炒花甲$138】豉椒+三色椒+洋蔥炒花甲，肉爽口，絕對新鮮。花甲都幾多，味道帶少少辣，惹味十足。【芥末和牛粒$108】wasabi和牛粒，少少「攻鼻」嘅刺激。牛肉粒好軟腍，帶油香肉味濃，真係和牛唔係扮架喎～【干炒牛河$88】唔知點解聽到鑊氣就想食干炒牛河。啲牛肉好高質，仲好多添，河粉就係幼身嘅，食起嚟口感幾好，仲有芝麻、洋蔥同韭菜令成個河粉更可口。本來只係落街簡單醫肚，估唔到又發現新大陸。