蔡潤記 (Closed)

前文講到我去咗陳漢記食腸粉，但我留力食下一站，就係食蔡潤記嘅魚蛋喇。午飯時間黎，好旺場，雖然唔洗等位，但一定要搭檯。想食乜？只要望住牆上面嘅餐牌就一目了然，呢度都幾彈性，雙拼唔洗加錢。不過我今日只想食魚蛋河（$30）。湯頭偏濃味，我已經冇加腩汁都覺得重味，河粉好滑溜，魚蛋同魚片屬小巧型，細細粒咁，魚味幾足，亦夠彈牙。檯面有辣椒油，真係得油，冇辣椒渣，有啲可惜。一碗魚蛋粉，份量細細，食量大嘅未必夠飽，難怪我見周圍嘅食客，有啲淨食加碗麵，有啲加底，各適其適隨你鍾意點配搭。