心事如塵茶食亭 (海暉大廈) (Closed)

鰂魚涌新開嘅心事如塵茶食亭，以 Dustykid 為主軸，為客人送上正能量，可謂鬧市中嘅心靈驛站。店內到處都有發人深省嘅勵志 “金句”，亦有 Dustykid 嘅作品可供借閱，故此相比起食物，我覺得店內嘅氛圍更為吸引。點咗店主推介嘅熱賣飲品爆檸梳打，即係無糖檸檬汁溝有氣梳打，再配以大量新鮮橙片，賣相甚佳；一啖入口，只覺非常清新解渴，確實係消暑恩物👍。再想食啲嘢，於是又叫咗個塵丼丼主食套餐，主菜點咗煙三文魚沙律，飲品就揀冷泡塵茶王（台灣鐵觀音）。沙律嘅煙三文魚份量正常，再加上兩片烚蛋同底下嘅蔬菜（粟米，生菜，紫椰菜，蕃茄仔等），感覺豐富；醬汁可以揀芝麻醬或柚子醬，我揀咗後者，酸酸哋，好清新，同個沙律好夾。至於樽鐵觀音就頗為清香，不過對於已成茶精嘅我嚟講就略嫌淡咗啲啲😂。