鍋居火鍋專門店 (Closed)

今日去深水埗黃金買嘢、突然心血來潮想去打邊爐就上網搵吓附近有冇一見就見到鍋居、又近識玩食字已經吸引左我、就過咗一條馬路去會一會佢。一坐低服務員好識做、夏日熱辣辣就問我哋飲唔飲啤酒凍飲、雖然我唔飲啤酒但係見到最近勁HIT嘅藍妹啤酒換領站、即刻上佢個網登記做會員就送兩支、不過我哋唔飲酒所以嗌左一扎自製嘅蘋果雪梨茶、唔太甜又真材實料值得一讚仲要夠凍添。叫得鍋居真係好多鍋選擇、我哋仲叫咗個鴛鴦鍋、分別係成都麻辣鍋和香茜皮蛋、不得不讚嘅係佢嘅辣到可以叫侍應不斷加、加到你覺得夠辣為止。好肚餓、兩個人叫咗好多嘢、有醉雞、鵝腸、黑柏葉、豬天梯、脆肉鯇魚腩、不得不叫嘅係自家製四寶丸因為好多汁、仲有即叫即炸嘅響鈴同埋特級手切肥牛、肥牛同荃灣楊屋道街市某某出名牛肉店的肥牛一樣咁好食😋重點係唔洗排隊價錢又唔太貴。其實食咁多火鍋店、呢一間服務估唔到佢咁好、諗住是但食個火鍋、點知道佢嘅服務比到酒店級我、食到咁上下又會幫手換碟又會幫我哋撇油、呢一餐火鍋係我會記得嘅一間。