阿翁廚房 (Closed)

小弟一直都喜歡食上海菜，有緣經一位「港島人」介紹下去探訪「阿翁」！「阿翁」深居簡出，在筲箕灣道樂融軒前出斜上樓梯轉左的小路裏，我Google map完，都要搵左一陣！自己食親上海菜，都會點擔擔麵、小籠包、鍋貼，今次都唔例外。麵條硬度適中，配料豬肉碎，花生加埋濃湯一齊食，又唔係好辣，味道一流！每次小籠包一上台，都想襯熱食，又怕被包裏既熱湯整親咀。今次都唔例外，又辣親咀了！至於個包皮厚度適中，裏面d饀係豬肉，好鬼滑，最好味都係d湯，超級甜！鍋貼煎得好香口，少少燶，剛剛好，簡單菜色，一流水準！雞絲粉皮一直以來都係我最愛嘅菜式，雞絲同麻醬永遠都係一個絕配，粉皮質地剛剛好，衣一款前菜真係無得輸！最後整多碟乾煸四季豆。炒得火喉十足，十分新鮮，咬下質感爽脆，十分惹味，份量好多下，食唔停口。食物好多親手做，好考功夫，值得支持！