廿七窩 (Closed)

我食神自問食好嘢食到大，估唔到今次終於遇到一間隱世超水準餐廳！ 一入到餐廳見到張張枱都坐滿人，心諗未夠八點就已經咁好生意，睇嚟都未必有得食，好在職員面來笑容幫手搵位同招呼客人，今時今日咁嘅服務態度簡直一流。 嚟到呢度自然要食撚手菜喇，問吓其中一個鬼鬼地成個碧咸咁靚仔嘅老闆有咩好介紹，佢就因應返我地嘅口味同要求去介紹，老闆咁體貼，我地自然就交俾佢發板。 先嚟香口嘅伴酒小食（黃金炸魚皮，炸雞粒同炸魷魚圈），一食落口就覺得香脆可口，再飲啖啤酒隨即提高食慾。 再嚟豉油皇中蝦，每一隻蝦都非常入味，外脆內爽，好食到連蝦頭都食埋。至於豉汁蒸鱔，色、香、味俱全，魚肉又鮮又爽口。 而霸皇雞一上枱就已經覺得好有氣派，一入口更加驚為天人！雞居然有雞味，仲要同時食到鮮味，本食神已經有好多年未食過又入味又帶鮮嘅雞，值得表揚。 最後嘅炸豬手亦無得彈，皮脆而肉嫩，擺盤一流加上用一朵花去襯托。既係美食又同時係藝術品。 一餐飯居然有味覺同視覺嘅一流感受，真係不枉此行！