Amour Green (Closed)

今日同老婆一家人去食飯，家姐訂左台食旺角西餐。極來都無咩好感，一向唔鍾意食mk野，點知竟然有驚喜。第一個驚喜，店內有pokestop，仲長期有櫻花，可以方便我捉精靈。第二個驚喜，店內裝飾頗有格調，一d都唔迫唔嘈，仲有得包場添！第三個驚喜當然係食物啦！我地一行5人，叫左四個主菜（兩個二人餐）同兩個小食。兩個二人餐抵讚，有齊餐湯、沙津、頭盤、主菜、甜品，一d都唔hea。頭盤一set有三款，各有特式。最鍾意係鵝脾多士，鵝脾好肥美，火候剛好，外脆內軟，口感好正。《燒牛柳》牛肉好新鮮，質素高，唔係低級既牛肉。牛肉有好濃牛味，有咬口，肥瘦剛好。火候方面，就扣左少少分，5成熟未夠準繩，生左少少。《黑松露意大利飯》呢份主菜好足料，見得到大大份黑松露，並唔係用黑松露油代替。意大利飯好有誠意，好用心煮，幾乎每一粒既生熟程度都一樣，全部都好均勻甘沾滿忌廉汁，十分抵讚。意大利飯火候剛好，煙煙韌軔，好好口感。味道方便，本身醬汁味道已經好濃厚，加上黑松露就提升多一個層次！《芝士焗牛肝菇》大大隻牛肝菇上面鋪滿香濃芝士，配少少煙肉同香草，好誘惑！芝士味道好香濃，香草吊味令到芝士味道更突出。加入煙肉，又會有多一種口感。