辦館 (雅蘭中心) (Closed)

想搵個地方坐下吹下水，一聚咖啡館當然無位啦，行過雅蘭見到有辦館，後面有張幾隱蔽嘅枱喎，正好可以同朋友傾偈用。完全不起眼的舖位，好彩有個霓虹燈招牌。下午茶tea set可點蛋糕加飲品，$30一客，轉咖啡另加$15，都算抵啦。是日精選蛋糕有三款，三樣都試下。黃色係檸檬味芝士蛋糕，酸酸地幾好味。中間啡色係朱古力海綿蛋糕，蛋糕濕潤，綿綿的幾正。最後係啡黃色個件，好似係橙味朱古力蛋糕，無乜印象係咩味了，三件都唔差嘅，不過賣相欠奉，自助餐廳係咁啦。飲品轉左做巨峰疏打，熱玫瑰鮮奶咖啡，同紅豆鮮奶抹茶，細細杯好的骰。疏打基本上係一杯冰，正好為夏天解解熱。玫瑰花好香，啡味就無啦，但勝在奶滑。最後係自己點嘅抹茶，個人覺得係三杯入面最好飲，超濃綠茶味，加上硬實實嘅紅豆好有口感，喜歡綠茶制品嘅朋友值得一試。最埋邊呢張枱可以撘到十二個人，一大班人都ok㗎。枱上有自行清潔牌子提示食客掉番自己嘅垃圾，可惜商場沒垃圾桶，要行到去電梯口先有，搞到勁多人都無掉自己飲完嘅膠杯，食完嘅膠叉，唉，工民教育有待增強。