霸嗎拉麵 (Closed)

尼間拉麵店都開左有一段時間，見到尖沙咀果間分店既評價都唔錯，一直都好想試下，但每次星期六日經過都好多人。今日趁平日無乜人，終於有機會一試啦！下午四點左右黎到，提供緊午市套餐，有飯有拉麵選擇，$48 起無加一，一個套餐包汽水一罐。黎到拉麵店，我地當然要先試下佢既拉麵啦，拉麵午市套餐只有2個選擇，我同朋友就分別簡左炙燒豚肉味玉拉麵配羽根燒餃子同雞叉燒雞白湯拉麵配唐揚炸雞。上菜速度都好快，十分鐘左右就有野食啦兩個拉麵既湯底都好香濃，應該係足料淆左好耐，唔會好似某啲拉麵店既湯底好似溝左水咁稀。唯一略嫌雞肉湯底油左少少，食得多會有點膩。麵條無得選擇軟硬度，但食落我個人覺得岩岩好，麵有少少彈性，唔會煮得太過耐個人比較鐘意黎個豚肉拉麵，叉燒半肥瘦，肉質鬆軟，果然係慢煮左十個鐘，叉燒經過炙燒更加香口。味玉亦唔會太鹹，咬落流出濃濃既蛋黃汁。至於炸雞同餃子就普普通通，中規中矩啦。