滾喜火鍋專門店 (Closed)

天氣開始凍最適合嘅就係打邊爐，知道旺角通菜街開咗間新嘅火鍋店，所以決定去試吓。餐廳位於旺角女人街，位置非常方便，而且新開張仲有八折。入到去見到裝修好有心思，座位非常舒服，樓底高所以非常寬敞。 鴛鴦湯鍋可自選湯底，點左蕃茄濃湯同香茜皮蛋鍋，蕃茄濃湯蕃茄味非常濃郁，香茜皮蛋鍋，材料十足仲好多皮蛋。炸鹹蛋魚皮，鹹蛋黃包住脆卜卜炸魚皮，每一啖都充斥着鹹蛋嘅香味，食到停唔到口。另一款鬼馬油炸鬼，油炸鬼上面加左蝦滑，爽口彈牙嘅蝦滑加上脆卜卜嘅油渣鬼，口感一流。白鱔片鮮甜彈牙冇腥味，脆鯇片新鮮非常爽脆。游水海中蝦，味道鮮甜而且爽口彈牙，仲好大隻。元貝好大份，隻隻完貝都好大粒，而且洗得非常乾淨，鮮甜之餘仲冇沙。頂級雪花安格斯，脂肪分佈平均而且呈雪花狀，肉嫩多汁而且牛味十足。鴛鴦滑拼盤，蝦滑加上蟹子食落仲有蝦粒，牛肉口感一流。豬潤厚身，好大份好好味。😋皇帝菜翠綠新鮮，蜂巢豆腐同紅薯粉吸收左湯嘅精華，味道一流。竹蔗茅根水材料十足，而且甜度適中。餐廳員工服務態度一流，而且價錢超值。