Anyhow Bar & Restaurant (Closed)

之前朋友介紹話野食好正，係門口睇過餐牌，覺得價錢都合理同老公然後就入去試下。朋友介紹我必食溫泉蛋海膽意大利飯，慢煮豬鞍同蒸生蠔。生蠔本身我唔食所以冇叫，叫左海膽飯，豬鞍，蒜香雞翼同加左58元有一個餐湯，蒜蓉多士同飲品，不過由於太夜去，豬鞍已經賣哂，所以轉左食西冷牛。個蒜蓉多士唔簡單，唔似一般多士得個硬字，佢真係外脆內軟，見到係好有heart既。個海膽飯一上枱簡直喜出望外，舖到密既海膽，每瓣海膽有兩隻手指個埋咁大，再睇番個價錢，就知係益街坊冇錢賺，小店搵食真艱難。蒜香雞翼隻隻都大大隻，又脆又香濃蒜味。個西冷牛，牛味濃，大大份，再配上沙律菜及焗薯，二百零蚊確係超值，唔係快餐店果d用好多醬汁去蓋住雪味既牛扒。所有食物都高水準，價格實惠，埋單五百有找，平均二百零蚊就食到高質西餐。唯一不足應該係廚房唔夠人手，上菜較慢，所以真係要耐心等待。