麵館皇 (Closed)

小肥其實已經好耐冇叫外賣食，今次叫都係因為自己朝早趕住返工，漏咗個飯盒喺屋企。為咗要寫食評，所以特登揀咗一間每日返工必經而自己又未試過o既「麵館皇」。XO仔好怕等，故此叫親外賣一定會預早十分鐘打電話落單，夠鐘先去自取，慳埋貼士 。細細間o既「麵館皇」，大約有四至五張四人枱，燈光較暗，地方不大吸引，好在接線生夠醒目，效率高，十分鐘內嗰麵已經準備好，小肥比完錢即閃。 小肥叫咗碗水餃雲吞刀削麵（$45），湯底味道正常，冇乜特別。刀削麵份量都算多，水餃雲吞各三隻，不過因為水餃同雲吞層皮發到好脹 ，所以雖然看似好大隻，但似係食麵粉多過食餃子，加埋咁多刀削麵，感覺自己喺度食緊麵粉餐咁，食到個肚又飽又脹，結果更飯氣攻心，喺公司度狂放蚊 。除咗有效率高o既伙計只外，「麵館皇」o既食物真係未能取悅到小弟 ，下次如果要再叫外賣，個人會選擇試其他餐廳囉！