博多拉麵別天神 (Closed)

之前已經食過銅鑼灣同尖沙咀店，近排知道灣仔有一間，所以今日做完facial 後，Mr.J帶咗我去食喇。別天神一向都係我同Mr.J都喜歡食嘅，特別係蝦味噌豚骨拉麵。今日蝦味噌豚骨拉麵無得賣，所以同Mr.J都叫咗別天神套餐，跟餐嘅小食分別要煎餃同小龍蝦蟹子沙律。小龍蝦蟹子沙律好好味，每啖都有小龍蝦肉，食落去好滿足。而且用紫菜包住食，味覺上好夾。煎餃一般，如果個底脆少少會更好。豚骨拉麵嘅麵底係幼身，比較爽口彈牙。叉燒比較瘦同淋，無咩特別。隻溏心蛋不錯，無過熟，仲有少少嘅蛋香𠻹。我最欣賞嘅係個湯底，有唔少嘅拉麵店為個咗豚骨湯可以呈現出奶白色嘅濃厚骨湯感覺而加奶類製品落去，而別天神唔會加依啲野落去，加上唔落味精，飲幾多都唔口渴。依度嘅湯底味道上不錯，唔多油唔太濃，飲落去唔杰身，感覺有啲似屋企煲嘅魚湯，好好飲。下次要嚟食返我最喜歡嘅蝦味噌豚骨拉麵！