越滿 (Closed)

一號風球懸掛，時不時橫風橫雨，逛街時甚是狼狽。唯有找個地方避風雨兼吃飯。轉入洗衣街，就找到了這個 “避風塘” 。它是一間越南餐廳，不算大，牆身的繪畫活潑生動，充滿越南情懷。二人套餐 $288都幾多嘢食，價錢OK，仲包兩杯飲品。飲品點了一杯凍青檸水和一杯過鹹檸梳打。凍青檸水好清新。飲鹹檸梳打要小心一點，不要過份篤粒鹹檸，否則會令到杯嘢好鹹，好彩我醒目，一路篤一路試下味，啱味就收手。好快啲食物就上來。【越式炒飯】炒飯金黃色，好吸引。雖然配料只是雞蛋、肉粒、粟米粒、蔥粒、彩椒粒、提子乾，但炒得的味道又幾好食喎，可能加了越南著名特產魚露吧，所以特別香。【香茅豬扒】大大件香茅豬扒斬開，方便食，豬扒都好入味。【炒芥蘭苗】夠鑊氣。【鮮蝦米紙卷】層皮晶瑩剔透，包住蝦肉、青瓜、米粉等材料，蘸上魚露就好好食喇。【咖哩軟殼蟹】最遲上來。店員要點火加熱。加熱後，咖哩香味飄出來，口水都流埋。軟殼蟹浸滿咗咖哩汁，好香且脆口。埋單三百餘，咁多嘢食，抵啦!