日和号壽司料理 (Closed)

去 Megabox 睇暑期溜冰班資料，順便欣賞下人哋玩冰曲，睇完就見到響側邊呢間壽司店做緊半價，於是就入去食晚飯啦，行入去店裏面就見到列車迎面而來， 暫時滿足吓去旅行嘅心願。我哋喺半價餐單上面揀咗：刺身、壽司、軍艦、八爪魚小丸子，當然唔少得每人要一杯飲品啦。蟹子沙律軍艦咬落卜卜脆好過癮，香蔥吞拿魚腩碎軍艦好香有魚味，海膽軍艦甘香軟滑 甘海老壽司鮮甜軟糯，火炙左口魚邊壽司滑滑兼充滿油香，油甘魚壽司肉質油潤，稻荷吞拿魚沙律壽司， 薄薄嘅腐皮帶點香豆，包住吞拿魚碎沙律同飯幾特別。七味火炙鱈場蟹棒上面洒咗七味粉，幾惹味。而鱈場蟹棒啖啖肉好充實。我哋鍾意食帆立貝，所以叫咗三款帆立貝、胡麻醬火炙帆立貝、火炙柚子胡椒帆立貝，鮮甜嘅帆立貝點整都好味。吉列炸生蠔壽司新鮮炸出嚟脆卜卜，其實壽司飯都唔錯。八爪魚小丸子又係新鮮熱辣，聞到香噴噴。生冷嘢唔食得多，所以刺身淨係食咗最愛嘅帶子咋左邊嘅係士多啤梨梳打，裏面有啲士多啤梨肉架。右手邊係梅子青檸梳打，梅味十足，夠曬解渴。