麵屋一平安 (Closed)

再戰銅鑼灣區嘅拉麵，貪呢度夠方便，又唔洗等位。一個人食，店員安排咗吧枱位置。呢度裝修富日式風格，亦設有卡位，適合同朋友聚會。望望menu，再睇睇店內嘅食客，其實大部分人都係幫襯料理食品，雖然店名為麵屋一平安，其實拉麵選擇並唔多。每人會有一碟前菜，收費$10。辣豬骨拉麵製作需時，期間睇到其他烹調好嘅食品，賣相都好似唔錯。終於等到拉麵上枱，即時聞到好濃嘅蒜味（但我真係好怕蒜味）。有兩塊叉燒，味道一般，我較喜歡稍為燒過嘅叉燒，會更香口。其他配料並唔多，只有少許蔥、紫菜。麵上有特製辣醬，但只有少許辣度。湯濃而稠；麵條軟硬適中，沾上湯吃也不錯。食食吓店員話有得抽獎，食品可即時或日後先redeem。抽到炸雞，諗住份量唔太多，所以即日食埋。都等咗幾耐，不過炸雞係full portion，有8件，嘩，真係抵哂。大大件，亦炸得皮脆肉嫩，夠惹味！可惜一個人食實在太多，食唔哂。埋單計埋加一$80幾蚊，都算ok。