冬蔭公公 (Closed)

十點幾先得閒食晚飯，見冬陰公公仲有好多食客一於試下佢。一入門口，有個男侍應大叫“唔係吖嘛，十點幾仲有客”，咁……我仲食唔食好呢？此時有另一個女侍應帶位入坐，算啦，一場黎到食一食佢。冬陰魚腐米線，魚腐有三塊，軟軟的都幾好味，湯底酸酸辣辣，好開胃，大愛配料嘅芫荽同花生。金菇肥牛卷，好有牛味，但金菇太韌，好難咬開。旁邊有個咸咸地嘅醬料，有少少蒜頭味，幾特別。要了一杯凍檸蜜，檸味同蜜糖味比例唔錯，好飲。食物是幾好的，但係啲侍應態度嚇人，一路食一路用漂白水拖地。其實當時好多食客，點解要拖地呢？抹完地下嘅布又用黎抹枱，好唔衛生。另外侍應談笑間不斷用粗口互相問候，又不停問收得工未，做死人咁，真係好難再幫襯囉。