澳瑪葡國菜 (Closed)

今日下午我們喺尖沙咀做完嘢之後去咗海港城行吓，行到海運大廈嗰邊已經係夜晚大約7點幾，所以我們就睇吓有咩餐廳食飯，行咗一段見到有間係食特色葡萄牙菜叫「澳瑪葡國菜」嘅餐廳，而且店外擺放著一個牌話用Citibank信用卡答帳，就可以有支紅酒或白酒送，而且都有幾多人喺度等位，所以我們就決定入去食晚飯！我們問店員有咩招牌菜同埋比較受歡迎嘅可以推介畀我們？店員就推介咗炭燒鰂魚燒得好香脆同香氣撲鼻，肉質相當鮮甜嫩滑，底層鋪滿咗雜菜同薯仔，而且吸收晒魚肉嘅鮮味同炭燒嘅香味，真係好正呀！招牌炭燒霹靂春鷄嘅肉質非常嫩滑，就算係鷄胸嘅肉質都唔會有「嚡」嘅感覺，而且外層嘅燒到有一層焦香，再喺表面搽上秘製嘅醬汁，味道相當惹味香口！葡式烤乳豬嘅外皮烤得好香口脆身，肉質相當鬆軟嫩滑，而且唔會有太多嘅脂肪，所以唔會有好油膩嘅感覺！葡式肉腸焗鴨飯嘅飯吸收晒鴨湯汁嘅精華，焗到金黃色，而且表面有啲焦香同鋪咗啲煙韌嘅肉腸，飯嘅入面放咗軟滑嘅鴨肉絲，令到味道更加芳香，真係好惹味！店內嘅環境裝修相當舒適，餐具同咕𠱸亦印咗餐廳嘅名稱同圖案，真係幾有心思！