日船章魚小丸子

Open Now

Now Closed

日船的小丸子真係冇得輸，一直都保持到質素，我都好開心旺角開左日船。呢度買野食冇得用八達通，直接俾錢收銀員。到我買時剛好要等，我就企埋一邊等。大家都知道，店後面有人負責燒小丸子，燒完入盒就會交給收銀員揤醬同加木魚。一路都覺得唔太衞生，因為隻手掂完錢又揤醬，但諗住唔係直接掂到食物所以就算。但喺我等緊小丸子的時候，我見到收銀員補充番枱面的木魚同醬，佢用剛才收完錢的手直接從一袋的木魚，一手一手咁抓起放入枱面的甕內，然後再從一包未開封的沙律醬，剪角揤入一支瓶中。我睇到嚇親，隻手未洗過但直接掂食材，以前冇疫情都驚啦，依家仲得人驚。我強烈建議收錢的人唔好參與處理食物的過程，講真一收完錢就掂食物或包裝，真係好污糟。希望情況得到改善，令大家食得安心。