一寿司+ (Closed)

是咁的，我地兩個人原來book左6:45pm，但我朋友6:30pm就到左，又唔想行，所以想入去坐住先，點知侍應話，堂食時間係入坐起計1.5小時，於是我朋友等埋我先去……個日係星期四，估唔到都要計到咁足，算啦……我地唔係第一次食，係覺得佢食物好先再來。主要叫左壽司，特別出色的係牡丹蝦、劍魚三味、同埋左口魚邊，好鮮味，稍為失色係海膽，苦苦的，份量亦小。其他我地叫左三文魚刺身沙律同埋吉列炸蠔，呢兩樣都係每之必點，個沙律d菜係好新鮮好脆，三文魚鋪滿個面，醋汁酸甜適中，係好抵食既食物；另外，炸蠔好大隻，肉肥多汁，食到lam lam脷。其他我地叫人落單、加水茶，應左我又唔做，掛住係部落單機旁嬉笑，已經唔係好like。我地邊食邊傾食到8:15pm，都未食完(雖然只係仲有半碟沙律)，佢真係叫我地埋單，但當時成間店只係full左一半，無人等位，咁都趕人走，講真你間野都唔係好平，我又食晚餐，駛唔駛咁趕客？兩個人食左$47x蚊，其實唔係好多野，因為d壽司係偏細件；但今次覺得d服務係好差，係無人等位、客又未食完野既情況下趕人走，絕對係大忌，講起都嬲嬲地，下次食其他算。