沙嗲王 (Closed)

由於工作早放嘅關係，同朋友約咗早少少去食沙嗲王，再慢慢行街。可能因為食飯時間尚早，唔使等位就可以入座，客人都唔算好多。同朋友點咗二人餐，佢點咗日式蟹粉豆腐鍋配飯，而我點咗沙嗲肩胛肥牛拉麵。試咗少少朋友嘅日式蟹粉豆腐鍋配飯，味道頗香甜，不過唔係我杯茶haha。去沙嗲王食沙嗲肩胛肥牛拉麵已經變成我嘅指定動作。不過呢次覺得沙嗲湯底味道太淡，沙嗲味唔夠濃郁。而肥牛都係普通，稍嫌薄身，入口無乜口感。老實講有啲失望。蒜蓉牛油雞翼（4隻）雞翼係必點，牛油香係足夠，蒜香就真係唔太食到。不過我同朋友都係志在食到熱辣辣嘅雞翼。石鍋奶油娃娃菜呢款係陪朋友食嘅，自己無咩興趣。客觀而言，娃娃菜係幾香同爽口，可能因為加咗奶油。不過亦因此有種油膩感，雖然係菜，但都唔敢食太多。飲品方面我一落單已經講明係要凍青蘋果紅茶（配啫喱），但張單寫住凍荔枝紅茶（配啫喱），未上飲品我已經同另一位店員反映，佢話會幫我轉。點知一上仍然係荔枝茶，結果又要再搵店員......想飲杯野都難。