魚鱻魚湯專門店 (Closed)

工作關係要喺新浦崗搵食，揀咗呢間，一睇個招牌就知道係食魚嘅，早幾年喺荃灣食過，今次就試下佢地嘅姊妹店啦。一坐低就有奇怪事件，話說啱啱睇緊個普通餐牌(價錢係平D嘅)，然後放低睇另一個(價錢係貴D嘅)，有個阿姐即刻收咗個平D嘅餐牌，叫我揀貴D嗰個入面嘅野，因為佢係好有禮貌咁收，所以我都好有禮貌咁問佢點解唔比我揀平D嗰個，於是個阿姐就Sell我貴D嗰個好食D架，我話我都想叫平D嗰D，佢然後先至話平D嗰個餐牌無魚架，我真心覺得奇奇怪怪，估唔到呢種細細間嘅類似茶餐廳都會Hard Sell你食貴魚。最後發現有個$55嘅魚套餐，於是就叫咗，始終Lunch唔想食到最平都要差唔多$80嘅餐。$55有碟蒸魚(豆醬蒸白花魚)加一碗魚湯，我就叫咗米線唔要白飯，仲連埋一杯凍飲添，算超值啦。豆醬蒸白花魚比想像大碟，肉質都新鮮嘅。魚湯比想像中差，魚味唔夠濃，有進步空間。不過唔鯹兼熱辣辣，$55算係咁啦。米線咁樣上法就麻麻地，因為會黐埋一pat。