Gontran Cherrier (Restaurant) (Closed)

星期日兩位3pm 左右去食嘢, 餐廳唔使排隊，買麵包俾錢條隊就人流不斷。餐廳內安排座位真係隔足1.5米，唔係求其搵塊板隔吓坐滿人。第一次食，各人叫一個洋蔥湯，我要雞和大啡菇三文治，朋友要墨汁牛漢堡。洋蔥湯我食落感覺係雞菜湯底，咸度啱啱好，配一件芝士多士。芝士多士好多cheese，正。朋友話洋蔥湯各家各法，呢度個味似外國食嗰d，不過我都係鍾意牛湯底嘅洋蔥湯，呢個我覺得唔夠濃郁。我嘅三文治都幾足料，非常飽，入面個汁好食，雞和菇都係正常發揮，反而個包就無預期咁好，話係sourdough，但似普通西人包，無sourdough自然發酵個隻酸味。朋友個墨汁漢堡我無試，話唔錯。食完嘢去買麵包。感覺大家有點瘋狂，好似唔使錢咁，條隊算郁得快。朋友返屋企後試咗original 牛角包，話係佢成年食過最好味，不過法棍baguette就麻麻地。我淨係買左朱古力croissant同 杏仁牛角。朱古力普通，杏仁牛角入面有杏仁餡,外面有杏片和糖粉，好食。