Vic's 酒廊 (Closed)

大食會晚聚前先黎round happy hour似乎已經成為指定動作 。中秋聚餐訂於皇仁舊生會，歡樂時光就順理成章喺附近間維景酒店一樓o既「Vic's 酒廊」度進行。小肥收咗工由灣仔行去，半個鐘頭內到達，比想像中快 。六點左右，酒吧已坐滿人客，除咗有外地遊客，本地酒客都唔少，唔怪得知週五、六都設有最低消費啦！當晚全店滿座，不過唔算逼。樓面o既妹妹仔都好唔得閒，索取酒牌同叫杯飲品都要各等成十分鐘 ，人手唔夠，效率亦唔高。酒牌頗為殘舊，飲品款式算OK多，不過如果想飲香檳或汽酒必須成樽叫，XO仔唯有叫咗杯歡樂時光可享買一送一優惠o既雞尾酒「Snowball」 。「雪球」雞尾酒似係加甜版雪碧，都幾清新涼快！送酒有花生及薯片小食，不過小肥遲到，所以唔知要唔要額外收費，故不能評核是否抵飲抵食。