你妳 (Closed)

今次嚟到呢間專賣台灣特色小食嘅小店買外賣，喺屋企邊嘆冷氣邊嘆美食。小食店環境行小清新路線，乾淨企理。食物款式都幾多選擇，有台灣好出名嘅鐵路便當、牛肉麵、手作芋泥吐司、三文治、芋圓同台式飲品，價錢親民。芋見鹹蛋黃紫薯吐司賣相好靚，而且份量都好大好重手，吐司軟熟，芋泥、紫薯泥同鹹蛋黃泥口感軟滑，而且味道都幾夾，食材嘅味道好出，唔會好甜。吐司加$20可以轉套餐，可選擇甜不辣拼地瓜薯條或者一口鹽酥雞拼花枝丸，我就揀咗甜不辣拼地瓜薯條，炸到脆卜卜，好香口。飲品係包汽水或者冬瓜茶，另外仲可以加錢叫其他特飲。我就叫咗凍嘅冬瓜茶，清甜消暑，甜度啱啱好，夏天飲一流。酥炸大雞扒x蜜糖芥茉x芝士吐司雞扒返到屋企個外皮都仲keep到脆卜卜，雞扒調味啱啱好。仲有好多配菜，包括，生菜、青瓜同蕃茄，層次分明，配蜜糖芥茉同芝士味道食落唔會油膩。仙草2號裏面有鮮草、三色芋圓、小芋圓、水晶等。芋圓口感煙煙韌韌，芋頭、番薯同紫薯個味道都好出，仙草滑嘟嘟，$38咁大碗都真係好抵食。