肉餅哥小炒料理 (Closed)

旅行完先覺得香港嘅食物先啱自己食，今趟旅行真係無啖好食。趁夜機返到黎，一落巴士就見到肉餅哥，所以無咩點諗就入去了。蒸肉餅由細食到大，但都係黎黎去去都嗰兩三款，但呢度有成三十多款真係不得不佩服老細嘅大膽創意。記起早排食過餐花膠餐幾好食，所以就點左個花膠肉餅食，睇下呢度嘅做得好唔好過之前嗰間。而朋友就點左海膽肉餅，仲再柯打左個炸薯波黎食。炸薯波熱辣辣上枱，香脆得黎仲食到一粒粒薯蓉，唔會入口一團粉團咁，都係幾唔錯嘅小食。花膠肉餅份量十足，有成三大塊花膠鋪面而底下嘅肉餅都有成吋厚。花膠燘得好軟滑而且入口膠質非常重，每一啖都漿住漿住咁。而肉餅本身都做得好鬆軟，肥瘦肉均勻配白飯真係幾唔錯。可惜嘅係略嫌唔係幾夠味，要再加啲醬油調重少少味道。順帶一提，呢度嘅甜醬油真係幾好味，易入口得黎又咸甜啱啱好。而另一個蟹粉肉餅就轉左用煎肉餅去配。煎嘅肉餅飯風味比花膠嗰個更濃郁，除左多了一層香脆口感亦因為煎過令肉餅油香更突出。但同樣地都係覺得味道還是淡了一點，所以都加左啲醬油落去。我地諗可能係啱啱落機啲氣壓仲有少少影響先會咁樣。跟餐飲品揀左奇異果汁，一黎健康啲，二黎係清下旅行後嘅腸胃。另外呢度仲搞緊個影靚相就有得任