餃餃餃子 (Closed)

同朋友去開紅墈，話想食餃子，見到呢間好似唔錯，好似係日本開係香港的分店，於是來試下!去到未係好多人，見過咁多款餃子醬料已經好肚餓啦 我地點左生薑餃子、淡路島洋蔥餃子同埋明太子薯仔餃子棒，生薑餃子薑味重，岩晒中意食薑的我。淡路島洋蔥餃子就甜甜地，加小小味噌醬汁簡直一流! 薯仔同明太子既配搭好夾，好似食緊薯仔沙律個種好飽肚既口感，而且明太子亦唔會好似一般出面食既太鹹，係三款餃子最好味既一款。淨係食餃子緊係唔夠飽啦，主食我地食左牛筋豆腐主飯同埋日式牛筋沾烏冬，牛筋汁係餸飯一流既選擇，豆腐同牛筋都非常之入味不過牛筋唔係話好多筋，主要係肉多，炆得唔算好淋，同埋份量就偏少左D 不過烏冬就好驚喜，熱辣辣又彈牙，口感無得彈!朋友話好耐無食過炸雞，見Menu有於是試埋，炸雞既外皮粉漿比較厚，雖然雞肉都算嫩滑，但係粉漿比例令到整體味道減分。食炸雞食到熱辣辣，我就飲番杯柚子梳打，杯梳打唔會太甜，滋潤又好飲。其實仲有好多款餃子未試，下次再來Encore!