Popcorn Brother

Open Now

Now Closed

上次因為舖頭咁啱閂咗，無機會試。今日難得去南豐中心，就試吓睇吓舖頭有冇開，結果有開！終於有得試呢間嘅爆谷喇！因為係第一次食，所以都唔敢買太多，就買咗1公升(1桶)。佢係可以溝唔同嘅味，兩溝就加$3，我覺得ok，咁好過買2桶咁多，所以我就試咗焦糖味爆谷同埋朱古力味爆谷。朱古力味爆谷好香濃，相信都係因為店主冇慳到啲朱古力糖漿，大部分爆谷上面都有一層又厚又脆嘅朱古力糖漿，再加上朱古力糖漿嘅味調得好好，所以就非常之香濃，有啲似熱朱古力咁香濃。焦糖味爆谷都好味，基本上同頭先形容朱古力味爆谷嘅一樣，大部分爆谷上面都有一層又厚又脆嘅糖漿。因為焦糖味爆谷個味冇咁濃，所以會食到多啲爆谷本身嘅原味，加埋焦糖嘅甜味。焦糖味爆谷本身冇朱古力味爆谷咁濃，所以食完好多粒朱古力味爆谷之後，要飲啖水或者等一陣，先可以再食到焦糖味爆谷嘅味道，如果唔係會無乜味。下次再食嘅時候，我會由冇咁濃嘅味道開始食先，比較濃嘅味道就要之後先至食。