船皇 (謝斐道) (Closed)

係香港都食過好幾間船面，大部份都係幾難食下，湯底大多淡而無味，最好食嘅一定係係灣仔藍屋附近果間，雖然係好食但都幾貴下，成百幾蚊碗，所以一直都希望可以係香港揾到間性價比高嘅船面。加上上個月去完泰國，食咗碗好好食嘅船面，個心都成日掛住，見到有人介紹呢間新開嘅船麵餐廳，就特登出銅鑼灣去試一試。道道餸都想食，所以揀咗咩都有啲嘅船皇湯麵。碗麵賣相唔錯，睇上去啲餸都好足，又有牛肉，雞翼，豬肉，豬肉丸等，個湯底好得！有我係泰國食嘅8成！夠濃夠香夠野味！係我咁掛住泰國船面嘅時候食到佢，我覺得好感動，好滿足！呢58蚊我覺得值得比！泰國奶茶用咗個特別銀器載住，幾特別，但略嫌太甜。湯麵本身係有幾款麵底可以揀，因為我對任何寬麵情有獨鍾，再加上覺得河粉應該會吸湯啲，所以我揀咗寬河粉，可惜，啲河粉有8成都係痴到咁（如圖上）似食緊「粉件」多過「粉條」完全影響到碗麵，係呢碗麵嘅不足之處。雖然我始終都覺得灣仔藍屋果間好食啲，但計埋價錢，我都係覺得呢間值得食多啲！