香港仔魚市場二合海鮮餐廳 (Closed)

曾經去過韓國釜山的魚市場，先在地下魚市場即場揀生猛海鮮，然後再到上層的餐廳選擇煮法即時炮製，一試難忘，又有地道特色。香港也出名食海鮮，大多數人提起食海鮮都係去西貢，但從事漁業的朋友告訴我原來西貢的海鮮大部份都是來自香港仔魚市場。這天家人生日，知道香港仔魚市場內原來有間海鮮餐廳，決定光臨一試，看看香港的魚市場跟釜山的魚市場到底有何分別。不過book位時先知原來只得午市，無晚市提供的。約12時半到達，原來餐廳的面積都唔細，比想像中光猛，附近有枱客好似係魚市場d工人，又有幾枱好似係我地呢d街外客，清一色都係叫海鮮，再加d小菜。我地一行四人，問伙記有咩新鮮必吃介紹，佢話今日d蝦同扇貝都好靚，又問我地食唔食魚，我話我地得四個人，食唔到大條魚，佢就推薦我地一條野生瓜子斑，斤幾重，仲即場攞黎俾我地睇，真係幾生猛。傾傾下原來先知佢係老闆，就試下啦。先來個白灼蝦，d蝦係中蝦，唔算好大隻，不過好鮮甜，仲有好多橙色既膏，同個香辣豉油好夾，真係食唔停口，正正!!!第二道菜係香口的椒鹽鮮魷，同白灼蝦真係好唔同，d鮮魷份量好足，好香口，又唔會太咸，味道剛剛好。再諗起都覺得好味，如果下次再去，一定要encore!!