Video
Read full review
2021-03-31
4751 views
大家一般嘅理解，烏克蘭都係食羊食豬食雲吞兔仔肉，但其實烏克蘭菜其實有大家想像唔到既菜好似羅宋湯、甚至係好岩香港人食既雞扒 。呢間Ivan The Kozak已經開業20年，係一間正宗俄羅斯烏克蘭餐廳，老闆娘係烏克蘭人，但其實已經係香港住左25年，老闆IVAN係香港人，落地生根後仲生左兩個仔女，但咁香港既人點整得出地道烏克蘭菜？原來所有廚師都係專門係俄羅斯同烏克蘭當地著名既酒店同餐廳聘請返黎，而大廚仲曾經煮過餸比現任既烏克蘭總統食，所以可以將地道東歐傳統美既味道還原比食客。隨左有正宗既烏克蘭菜，仲有二十幾種東歐直送既俄羅斯伏特加美酒， 捷克、奧地利啤酒同各種東歐紅酒。因為老闆IVAN係屋企人既朋友，所以屋企人早已幫襯過幾次，屋企人帶左我食一次之後，隔三星期我再次幫襯同女朋友，因為呢度既野食有特色之餘仲好好食，覺得非常岩香港人既口味。去左食兩次都係早一個星期前說訂到，一次食星期六一次食星期日，兩次都係滿座，晚市會分6點同8點兩個時段既客。一入到去餐廳就俾佢個裝修吸引住，睇落好似一個烏克蘭家庭既環境，所有裝飾都係湛住烏克蘭嘅味道，原來所有傢俬擺設、掛畫同埋燈飾都係由烏克蘭同埋俄羅斯買返嚟，燈
大家一般嘅理解，烏克蘭都係食羊食豬食雲吞兔仔肉，但其實烏克蘭菜其實有大家想像唔到既菜好似羅宋湯、甚至係好岩香港人食既雞扒 。
呢間Ivan The Kozak已經開業20年，係一間正宗俄羅斯烏克蘭餐廳，老闆娘係烏克蘭人，但其實已經係香港住左25年，老闆IVAN係香港人，落地生根後仲生左兩個仔女，但咁香港既人點整得出地道烏克蘭菜？原來所有廚師都係專門係俄羅斯同烏克蘭當地著名既酒店同餐廳聘請返黎，而大廚仲曾經煮過餸比現任既烏克蘭總統食，所以可以將地道東歐傳統美既味道還原比食客。隨左有正宗既烏克蘭菜，仲有二十幾種東歐直送既俄羅斯伏特加美酒， 捷克、奧地利啤酒同各種東歐紅酒。
因為老闆IVAN係屋企人既朋友，所以屋企人早已幫襯過幾次，屋企人帶左我食一次之後，隔三星期我再次幫襯同女朋友，因為呢度既野食有特色之餘仲好好食，覺得非常岩香港人既口味。去左食兩次都係早一個星期前說訂到，一次食星期六一次食星期日，兩次都係滿座，晚市會分6點同8點兩個時段既客。
一入到去餐廳就俾佢個裝修吸引住，睇落好似一個烏克蘭家庭既環境，所有裝飾都係湛住烏克蘭嘅味道，原來所有傢俬擺設、掛畫同埋燈飾都係由烏克蘭同埋俄羅斯買返嚟，燈光都係特登用橙紅色別有用心，場上仲要掛住一個好大幅嘅基輔市(即係烏克蘭首都)嘅特色風景畫，再加上餐廳不斷播住非常休閒嘅音樂，猶如真係去咗烏克蘭當地餐廳進食緊，打造到咁原因係老闆想將餐廳飾得好似烏克蘭老家咁比佢老婆睇。
餐廳有分出邊掛畫區，同埋有一間房仔有四張枱，房就會比較靜啲，如果係大區，會見到老細每次都會幫人用基輔掛畫背景幫人影合照，非常好客而且睇得出佢每晚都會幫食客影相。
-
1️⃣ 正宗烏克蘭羅宋湯💰68（👅: 8.5/10）
正宗烏克蘭羅宋湯
$68
69 views
1 likes
0 comments
大家係香港飲到既羅宋湯都係紅，好似罐頭開出黎既顏色，但呢個同港式唔一樣，係用紅菜頭做，所以係鮮紅色。正宗烏克蘭羅宋湯同俄羅斯做法又會有小小唔同，係肉既用料唔同，俄羅斯係用牛肉，而呢度即係烏克蘭做法係用豬肉，而且烏克蘭羅宋湯既蔬菜比較多。隨左紅菜頭仲有sour cream、排骨、洋蔥、薯仔、椰菜、紅蘿蔔，落排骨係因為小小迎合香港人既口味，加排骨落湯會令湯既味道更濃。
紅菜頭食落新鮮帶甜，酸忌廉令到個湯酸酸甜甜，唔係人工既味道，飲落無平時香港既羅宋湯咁酸同帶小小辣，可能係因為比紅菜頭既甜蓋過左，忌廉令到湯味道更香滑，如果好鍾意香港既羅宋湯可能會唔習慣，但我同女朋友就非常鍾意呢個咁地道既湯。
-
2️⃣ 地道香燒豬肋骨💰198 （👅: 8/10）
地道香燒豬肋骨
$198
145 views
1 likes
0 comments
一上菜就外觀萬分，因為侍應會係豬肋骨上面燃點起火焰，豬肋骨上加左vodka，隨着豬肋骨燃燒緊，香味都隨即撲鼻。收火之後見到豬肋骨燻到顏色偏黑，食落夠晒軟腍，帶小小焦香，因為呢個豬肋骨煮法同美國有D唔同，香味都好足夠，比起平時會用既美式BBQ汁汁，會食到蜂蜜汁帶來既甜味同小小酒味既汁，但對我來講豬嘅味道冇話非常之出色，對比起牛脷同埋雞扒。
-
3️⃣⃣ 馳名基輔炸雞排 💰188（👅: 9/10）
馳名基輔炸雞排
$188
107 views
1 likes
0 comments
製作方法首先係將雞胸肉打碎，令到佢變得腍D，之後加鹽、牛油，放入麵粉之後再沾上雞蛋漿，呢個程序要做兩次，因為淨係做一次，牛油可能會漏出黎，之後就可以炸，5至7分鐘之後再焗一下，令到雞肉熟D。
一切開外殼個時就爆汁，而且見到入面既雞肉出哂煙熱辣辣，呢個就係基輔雞排加牛油既原因。雞扒食落非常嫩滑，全因有將雞胸肉打碎； 唔會太生太熟，恰到好處，因為炸完再焗；牛油水可以完美咁收係入面，因為有足夠麵粉同蛋漿，食落牛油味係爆出黎。外層既炸衣唔厚但非常脆，食落唔油膩。
隨左雞扒仲配左蘑菇汁同自家製既薯片，薯片都係即叫即炸，所以食落好脆，有新鮮既薯味。
-
4️⃣⃣ 芝士焗牛脷盅💰98（👅: 9.5/10）
芝士焗牛脷盅
$98
89 views
2 likes
0 comments
咁多道菜最滿足就係呢道，我幫襯過兩次，兩次都必點依道菜。
呢款芝士焗牛脷盅，係依度嘅招牌菜之一，侍應會將原本覆蓋喺盅上嘅香脆酥皮一分為四，可以將盅內充滿芝士醬汁嘅牛脷塊蘸酥皮黎食。牛脷咬落去非常之腍夠嫩滑，我諗係我食過咁多次牛脷最腍嘅一次，而且牛脷非常之厚切大塊，非常之有咬口，牛味豐富，食落係滿足感，酥皮稍為有啲厚同硬，但加咗濃味既芝士落去蓋過左呢啲小缺點，而且酥皮可以平衡一下芝士既膩。
-
5️⃣⃣ 俄國宮廷焙鹿肉💰228（👅: 8/10）
俄國宮廷焙鹿肉
$228
92 views
1 likes
0 comments
香港人平時無咩機會食到既鹿肉，呢間餐廳就可以試到。
鹿肉用紅酒燉煮完，所以食落甜甜地幾入味，鹿肉口感有D似偏瘦嘅燜牛腩，但肉質會較粗糙，同埋會有一陣特別既味道，可能係鹿既羶味，同鹿肉一齊燉煮嘅仲有蘑菇、薯仔，食落都係非常入味，份量仲要好大碗，但我可能自己食唔慣鹿肉既味道同質感，可能下次未必再點，但未試過既係幾值得試一次。
-
6️⃣ 雞肉蘑菇卷💰68（👅: 9/10）
雞肉蘑菇卷
$68
99 views
3 likes
0 comments
黎過兩次，兩次都有點呢道菜，發覺呢度既雞料理特別出色。
同平時用酥皮焗成既做法唔同，外層係用麵皮去炸，外層炸到非常脆，粉漿夠薄，外脆內軟
內餡係流心既白汁蘑菇、蘑菇汁同雞粒，味道非常豐富，內餡份量好多，而且雞肉依舊咁嫩，帶著濃厚蘑菇香，非常滿足。
-
7️⃣ 烏克蘭風味蜂蜜蛋糕💰88（👅: 8.5/10）
烏克蘭風味蜂蜜蛋糕
$88
81 views
2 likes
0 comments
問老細有咩甜品推介，佢就幫我地落左兩個甜品，第一個係烏克蘭風味蜂蜜蛋糕。
外表睇落完全唔似我哋食開嘅蛋糕，食落幾甜，係蜜糖嘅甜味，因為蛋糕同蛋糕中間充滿咗蜂蜜忌廉，蛋糕咬落濕潤軟熟，比起一般戚風蛋糕仲要軟熟，睇落係有四層既海棉蛋糕，蛋糕同蛋糕中間會食到有核桃果仁粒，同埋會食到糖霜，令到有口感唔止得軟熟而且有脆口，以呢個蛋糕作為結束非常滿足。
-
8️⃣ 烏克蘭芝士蛋糕💰88（👅: 8/10）
烏克蘭芝士蛋糕
$88
152 views
2 likes
0 comments
第二個老細推介既甜品係傳統既烏克蘭芝士餅，佢係煎既所以係熱既甜品，老細建議係點D汁會更好食。
上枱時溫度夠熱，聞到濃烈嘅芝士味，食落同平時食到既芝士味唔同，可能係因為用cottage cheese，而芝士餅口感似食麵包唔似蛋糕，如果你期望係蛋糕口感會失望，加berries醬汁食味道帶小小酸，食落小小飽滯。
另外我發現到上年呢個蛋糕係68蚊，到今年突然變左88，如果係同樣88蚊二者選一我會建議叫烏克蘭風味蜂蜜蛋糕，因為佢傳統得黎會有驚喜既味道同口感。
-
🍸 Kvass💰68（👅: 8.5/10）
Kvass
$68
99 views
1 likes
0 comments
呢個係一個好傳統嘅東歐飲品，係冇酒精嘅，原來歷史非常悠久，係由基輔羅斯時期，即係差唔多成千年前已經有既傳統飲品，佢成份係黑麥同麥芽酒，去飲落係好重麥味，而且會帶着絲絲嘅甜味，非常之有特色，好鍾意飲所以兩次都有點依個飲品。
-
🍷 Nalivka💰68（👅: 8/10）
唔講唔知呢個有15-20%酒精，飲落係完全唔覺。
呢個Nalivka係十七世紀開始係烏克蘭流行既酒類飲品，隨左酒精仲有水果、香草、香料，飲落有小小似利賓納，比較甜，都有D似紅酒加莓汁，係易入口既香料酒。
-
🌟食質來講絕對係高質，而且我覺得大部份都好啱香港人口味，加上環境真係好似係烏克蘭屋企食飯咁，如果真係想喺餐廳影多啲相，建議去開門嗰時就幫襯，因為晚市實在係座無虛席。隨左上述介紹過既熱門菜色之外，焗蘋果鴨胸、家常椰菜卷都係好多人叫既菜色。
我之後幫襯過兩次，兩次都係非常好既用餐體驗，第一次係同屋企人食，食到中期老細會攞住兩樽vodka請我哋飲每人一杯，叫我哋揀其中一個口味，聽屋企人講可能賣單去到一個數老細就咁做，會見到老細輪住去唔同枱斟酒，之後第二次同女朋友去，老細冇斟酒，反而嗰晚每台都會送一碟台灣嘅鳳梨，感覺每次去都會有啲小驚喜。
鳳梨
$8
54 views
2 likes
0 comments
-
👅味道: 9/10
🍴環境: 8/10
💰消費: $350-450人均 (服務費: 10%)
Post
