海潮食堂

Open Now

Now Closed

舊同事介紹海潮食堂俾我，第一次我足足喺成業街來回左幾次都搵唔到。明查暗訪原來毫不起眼的一度木門後，就係觀塘區美食所在地。每次嚟到，無論你係散客定熟客，只要老細喺度佢都會熱情招待。諗唔到食乜佢會幫你推介，再加上無限嘅吹水，講真細個跟老竇去工廠大廈食飯先會有呢種感覺，而家香港仲邊度搵到咁有人情味嘅地方呢講返食物，每次嚟到必食蔥花蛋治，蔥花蛋煎到熱辣辣，蛋芯依然係軟林林，再夾起兩塊脆卜卜嘅多士中間。口感好豐富，外脆內滑就係咁解。我係蔥怪，最鍾意多重，蔥花蛋毫不吝嗇嘅蔥花，簡直係我嘅恩物。自製麻辣湯底都係呢度嘅招牌菜，麻香味十足，辣得過癮。仲有就係凍啡樂都係每次必嗌，原因有次唔知飲乜好，老細推薦呢杯不可錯過。真係好飲喎！齋啡同可樂係咖啡因狀咖啡因，竟然出奇地配搭，可樂填補左齋啡嘅澀味；齋啡亦都令到可樂嘅甜膩平衡返。之後每次返嚟都一定要再飲，而家市面上都出咗啲罐裝咖啡溝可樂，但係點樣都唔夠海潮呢一杯好飲。