南亞餐廳1964 (Closed)

放工同同事落tst搵食，想搵間坐得舒服d chill d既餐廳，於是行去亞士厘道搵下，見到呢間有幾個外國人坐左係外面，入面又有梳化卡位，個感覺幾舒服，就入左去食啦。 呢間南亞餐廳係食東南亞菜，坐低無耐，侍應姐姐已經好親切地問我地想食咩，可以推介我地。 最後我地點左串燒拼盤、小食拼盤、Gado gado，牛尾煲、燒雞同甜品。首先黎左餐湯，係海鮮周打湯，入面好多料，仲有餅乾，味道好夾好creamy。之後黎左碟串燒拼盤，有牛肉雞肉，燒得好惹味，肉質唔會靭，好滿意。之後到小食拼盤，入面有蝦餅、咖哩角、春卷同德國腸，再配咖哩汁，最鐘意係蝦餅，超彈牙同有鮮味，想再encore !然後到gado gado, 第一次試呢道菜！好得意好特別，有少少似喇沙沙律，最面有我最愛既印度蝦片，仲有蛋同酸酸甜甜既羅白同椰菜！其實都飽飽地，但仲有個重點菜，就係最期待既燒春雞！單係賣相已經好吸引，燒到好香，d皮燒到脆卜卜，但又保留到雞汁，肉質鮮嫩，再配合馬來香料風味，超級好味！最後黎埋雪糕芭菲，揀左士多啤梨同芒果味雪糕，上面有少少cream，普普通通，但最後有個甜品做完結好開心！