RISE Kitchen (Closed)

平時較小去將軍澳區搵食，就算去都會去popcorn果邊，貪佢成個商場多食肆，但原來地鐵出口另一邊唐賢街果邊居然比我搵倒間好野，今晚個朋友就帶我去Rise Kitchen食好野啦。朋友仲話呢間餐廳嘅麵包同蛋糕都好出色，佢話呢度係用日本麵粉，每日用手製作麵包，用日本麵粉做出黎嘅麵包有柔軟度，口感較細緻，柔軟帶彈性。餐廳樓底好高，非常光猛，坐位闊落舒適。雞肉帶子葡式臘腸西班牙飯：呢個飯一黎到好香茄味，口水已係口腔滾動，好想快啲試下，飯熱辣辣，軟硬度適中，帶子超大隻，煎得好乾身，好鮮味，葡式臘腸只帶微微咸香，呢個飯超晒班，好好味😋。安格斯牛肉漢堡：🍔漢堡包入邊嘅厚切蕃茄，好大片好甜，茄味極濃，安格斯漢堡扒亦都好厚，咬落去好鬆軟juicy，牛味好濃郁。最尾緊係要order埋蛋糕🍰啦😋士多啤梨🍓海綿蛋糕，蛋糕中間嘅士多啤梨全部都有成半粒，又香又甜，仲有小小果仁碎，增加口感，蛋糕質感好軟綿綿，夾埋忌廉一齊食，更加增加綿滑口感。朱古力撻，濃濃嘅朱古力味已經係我最鍾意，中間仲夾雜一d脆脆（好似係爆炸糖）口感非常豐富，真係好喜出望外😃