一豊 (Closed)

今日同朋友入天水圍做義工，完左之後係附近天耀商場揾食。見一豊個餐牌都幾多選擇就入左去食。入面環境好寬敞舒適，我地嗌左2個丼share同一個卷物。三貝丼，可以一次過試曬3種貝！分別有北寄貝、帆立貝、活赤貝，好鮮甜同好厚肉，食落完全冇雪味！蟹皇丼，成碗放滿左蟹腳、蟹鉗、蟹籽、蟹肉、蟹膏，份糧好多！將蟹籽、蟹肉、蟹膏同壽司飯撈勻一齊食，唔單止鮮味十足，口感層次勁豐富！芝心軟殼蟹卷，芝士好濃郁，軟殼蟹炸到金黃香脆、啖啖肉好有咬口，仲有蟹膏、蟹籽同蟹棒，勁足料！性價比好高！總括嚟講，價錢合理又幾有水準，下次再去天水圍都要帶朋友去食！