三希樓 (Closed)

家庭聚餐，今次揀左爸爸鍾意食嘅川菜。三希樓明顯係高檔次餐廳，就咁睇佢擺位嘅密度就知道，超寬敞！事不而遲，食川菜一定要食辣嘢，我今日叫咗七餸一湯。因為太多嘢想食，所以無叫到前菜。首先飲番個杏汁白肺湯先。湯底清甜，感覺都好滋潤。麻婆豆腐呢類小菜先最難煮得好，用左比較滑身既豆腐，食落夠香味，唔係好辣。干煸四季豆都係一般川菜餐廳會叫嘅食物。因為有人唔食辣，所以揀左呢個雞汁燴大白菜。其實同平時煮菜差唔多，因為菜係必須品，所以無乜特別評論好食定唔好食……只可以話唔難食。呢個雞油花雕蝦兵蟹將係waiter推介的，話係用靚花雕整。一上菜就聞到啲花雕味，又真係好香，不過唔鍾意酒味嘅人就自己迴避下。蝦蟹同蜆都好鮮甜，如果可以自動波上埋個蟹鉗就更加細心喇。跟住仲食左個銅盤家鄉五指毛桃蒸滑雞。我覺得隻雞係好食嘅，夠滑，彈牙，入味。不過無嘩一聲嘅感覺。戲肉到喇。干鍋鮮田雞，下面仲有個火熱住啲食物。田雞好滑，麻、辣、香味都調節得十分之優秀。如果田雞嘅份量可以多少少就好喇。最後到呢個超大嘅鴛鴦剢椒蒸大魚頭。首先我唔知點解有隻魚個頭可以咁大……食落多肉，蒸到啱啱好，肉質滑唔鞋口，兩邊用左唔同椒，兩種風味，紅色偏香辣，