鮨竜 (Closed)

前幾日同朋友一齊去黃埔呢間高質嘅日本菜食Omakase。呢到嘅Omakase價錢都幾抵食，$480-$1880嘅都有，我今次就揀左個$980嘅。一開始就上左個茶碗蒸先。之後有以下四款刺身。北海道野生天然帆立貝依家嘅帆立貝當造，貝柱位特別甜。因為係野生嘅帆立貝，所以貝柱比較大，口感比較有彈性。師傅加左啲柚子喺上面，食落酸酸甜甜。笛鯛上面配上笛鯛乾醬，加少少生薑花。間八口感韌中帶有少少嘅脆感。長崎拖羅肉質鮮美，口感柔軟。之後就到兩款熟食。黑梅貝旨煮上面有辣椒絲，食落滑滑地，辣辣地鹹鹹地，幾惹味。免治雞肉棒用左雞軟骨，點埋長崎縣雞蛋嘅蛋汁，口感滑嫩帶脆。食壽司前有一份青檸啫喱，入口酸酸地，好清新。章泥烏賊膠質比較高，食落黏口，上面有柚子。深海池魚上面配上柚子胡椒。北寄貝上面加左青檸汁，食落口感比較清新。櫻鱒春天先有，依家食係捉緊最後嘅尾巴。雖然望落似三文魚，但食落比三文魚嘅肉身軟滑，比較甜啲。赤貝口感爽口。赤身魚味好重。北海道馬糞海膽海膽好清甜好creamy。紫菜都夠香脆。食完壽司飲返碗湯，之後就開始食甜品啦。甜品有兩款，分別係日本紫薯雪糕同埋法式焦糖蛋糕。兩款甜品都唔會太甜，好食。