博多拉麵別天神 (Closed)

別天神拉麵簡直同喺日本拉麵店嘅裝修一模一樣，門口設置自助販賣機，有位之後係販賣機俾錢，之後張飛交俾店員。餐牌只有2款拉麵及同2款小食，我哋兩個人叫咗一個別天神套餐同蝦味噌套餐，小食就share，咁就可以點晒全部食物。別天神套餐($105)套餐包一碗豚骨拉麵，以及1款小食。主角豚骨拉麵湯底保留好香濃嘅豬骨味，但又唔似正宗日本拉麵咁鹹，我覺得有機會調較過合適香港人嘅口味，滿意！而麵條亦都仍然保留煙韌口感，唔會過熟。配料就有流心蛋1隻同日式叉燒。流心蛋熟度啱啱好，正！日式叉燒唔會太肥，亦冇豬肉腥臊味！小龍蝦蟹子沙律（單點$35）份量唔算大，但非常足料。第一啖已經好驚訝，真係食到龍蝦肉，配埋一粒粒蟹子，好有口感！另外附送數塊紫菜可以捲住食。蝦味噌套餐（$115）蝦味增豚骨湯麵加咗味噌同大量櫻花蝦，所以令豚骨湯底更加香濃。我個人比較鍾意呢款湯底。配料同豚骨湯麵非常相似，但會多咗粟米，好味。餃子餃子熱辣辣煎得好香口，入面係白菜豬肉，好日式。最後，大家可以按個人口味或者師傅建議加添配料調制自己鍾意嘅湯底味道。