鮨政 (Closed)

香港仔嘅食肆好多，日本餐廳都唔少，但係呢一間係個人認為最高質嘅日本餐廳。舖面唔算好大，但係都幾多位，重點係有得坐bar枱，望住日本人師傅整壽司。我地嗌咗個壽司拼盤(上) ($300)，有油甘魚腩、吞拿魚腩、大吞拿魚腩、玉子、三文魚腩、鯖魚、左口魚、池魚、深海池魚、熟蝦、三文魚子、吞拿魚蓉、三文魚細卷六件。一共有18件壽司，真係件件都好好食。所有魚生都好新鮮，份量啱啱好。個人最鍾意佢嘅大吞拿魚腩，真係超級肥美。另外我哋仲嗌咗個雜錦天婦羅，一共有三隻天婦羅蝦同埋天婦羅冬菇、南瓜、茄子。佢嘅天婦羅蝦同一般嘅日本餐廳好唔同，因為佢入邊嘅蝦好新鮮好大隻，所以好有口感同彈性，同一般嘅凍蝦有好大分別。大家如果嚟食嘅話，一定要試吓佢嘅天婦羅蝦。最後我哋仲嗌咗個三文魚牛油果卷，一共有三件。冇諗過鋪係卷物上面嘅居然係三文魚腩，夾埋啲牛油果同埋青瓜一齊食，真係好正。希望下次可以試埋其他菜式啦。