Amplifier Restaurant (花園街) (Closed)

今日約左朋友黎呢間要上一層既餐廳食晚飯，餐廳都幾闊落，裝修都幾有心思，卡位坐得舒服，店員細心有禮貌，服務很好，食物方面都幾多選擇，由其係前菜，主食方面有手工pizza，意粉，意大利飯同扒類，仲有西式甜品。我地叫左個雞翼，一個手工pizza，一個扁意粉同一個甜品。份量都好夠，我地都食到好飽。水牛城雞翼-我地叫左五隻，呢度好好，有三個件數揀，唔使驚食唔晒。雞翼先炸又上水牛城醬汁，辣辣地，開胃惹味。四式芝士手工薄餅-pizza夠薄邊夠脆，茄醬適中唔會過酸蓋過芝士味，濃濃芝士再加埋salami，咸香好味。傳統意式蒜香蜆肉扁意大利麵-呢個都出色好味，有少少酒香同蒜香，蜆肉唔算大隻但都好甜，唔會過熟。意大利芝士餅-tiramisu夠大件，擺盤靚，旁邊有士多啤梨，芒果同藍莓，生果清甜唔酸，一啖生果一啖tiramisu，好快俾我地清左碟。