龍景軒

Open Now

Now Closed

一直都好想試下四季既中菜，終於都有機會黎一試，服務係完全冇令我失望，食物都冇可挑剔。但以米之蓮黎講，就覺得略嫌遜色左小小，特別係個wine pairing ，酒既質素非常一般。所有食材都好平穩，冇太大既驚喜。炸蟹蓋既炸粉冇咁厚比其他米之蓮中菜好，食完唔會覺得好滯。羊肚菌菜膽燉遼參喺成個menu 中係比較突出既一個，用湯整既遼參，非常入味，好鮮甜。和牛柳粒都好特別，佢係有小小炸粉喺面，入口有外脆內軟既感覺，juicy 。蠔皇三十頭吉品鮑拼星斑柳冇想像中咁出色，但鮑魚味都好濃郁。個signature 龍景軒炒飯，滿滿海鮮粒，口感好豐富，個飯都炒得好乾身。Overall ，成個體驗我都好滿意，雖然wine pairing 既酒唔出色，但個品酒師都好樂意聽我地既意見。