新竹源越南餐廳

Open Now

Now Closed

之前幫襯過呢間新竹源越南餐廳幾次，但一直都未有寫食評，今日終於要為佢寫一寫了！以前食開嘅越南餐廳無外乎都係越x，筆者多數食撈檬，不過人大左就漸漸改口味，而家鍾意食湯粉多啲。之前聽同事介紹呢間越南餐廳唔錯，長期都有好多人排隊，試過之後都覺得名不虛傳，佢嘅湯粉嘅湯底非常濃郁，絕對係呢間食店嘅賣點之一。今日我嗌左生牛肉金邊粉(順帶一提，佢嘅湯粉係可以自由轉檬粉、河粉、金邊粉或者飯，選擇頗多)，湯底一如既往十分濃郁，生牛肉肉質嫩滑；不過，今日嘅金邊粉質素一般，送到嚟嘅時候舊粉團仲未散開，要自己用筷子整開佢，呢一點算係敗筆。份量方面啱啱好，午餐跟熱飲一杯(凍飲加$3)，我嗌左杯熱奶茶，盛惠$62，價錢中規中矩。環境方面，喺繁忙嘅灣仔中心區域入面算係唔錯，至少坐得舒服，唔會覺得擠逼，可以慢慢食、慢慢同同事吹下水咁，唔會有食完就趕住要你埋單果種感覺。整體嚟講，新竹源越南餐廳係一間水準唔錯嘅越南餐廳，食得多中日韓菜菜式嘅朋友，可以嚟試下呢間！