十三少 (Closed)

今日早放學，係西環呢頭搵野食，見到呢間裝修好特別，非常古色古香。我地兩個人叫咗二人餐，有一個前菜、小食、酸菜魚，同埋兩碗飯，我地見個甜品好吸引，就加多28蚊要埋個甜品。呢度環境好靚，坐得又寬落，好舒服。同埋服務好好，會成日幫你refill水，同埋換碟。椒麻皮蛋賣相好靚，外層晶瑩剔透，而且係溏心皮蛋，食落好嫩滑，同埋有少少麻辣味，係一道幾開胃嘅前菜。川式口水雞見到大量嘅芝麻，配埋辣椒油，唔會好辣，但食落超香，係芝麻同埋辣椒嘅香味。 雞件好嫩， 雞皮爽滑，而且份量好多。十三少酸菜魚超大份，魚肉好多，配料仲有萵筍、蘿蔔同埋菇。魚非常新鮮、好滑，湯底唔會好咸，係每日用新鮮魚熬製，加埋酸菜好開胃，好適合撈飯食。紅糖糍粑食完辣野，當然要食番啲甜品滋潤下，糍粑係啱啱炸起，表面有好多黃豆粉，層層疊咁擺，賣相好吸引，紅糖又唔會太甜，好好食。