Felice Cafe & Pasta (Closed)

星期日嗰日同朋友去銅鑼灣行街，下午接近兩點嗰陣有啲肚餓。途經呢間cafe，見到有好多人食緊，應該幾好食，所以就入去食lunch啦。我哋一人叫咗一個意粉加一杯飲品。🦀蟹肉鹹蛋黃意粉 $98呢個意粉係扁意粉，鹹蛋黃味幾濃， 撈埋食又唔會太膩，仲有少少蟹肉添。碟意粉都幾大碟，應該就算男仔食都會夠飽。🦐明太子蝦肉忌廉意粉 $108呢個明太子忌廉汁勁濃，仲好creamy，我覺得好食。不過相比起個蟹肉鹹蛋黃意粉就會膩少少。蝦有五隻，本身以為係普通蝦仁，食落發現佢應該煎香過，蝦味仲好重，有意外驚喜。🥑牛油果乳酸沙冰 $42唔會太甜，幾好。同埋可能因為有牛油果，所以口感都幾creamy。🍹Unicorn $48係藍莓沙冰+火龍果沙冰+cream。飲落甜甜地，幾清新，同埋火龍果味幾濃。因為我鍾意火龍果味嘅飲品，所以我鍾意呢杯多啲。將啲cream撈埋落沙冰入面，口感就更滑啦。不過我覺得如果有粗飲管會好啲，幼飲管有少少難飲到，我頭幾啖係直接用口飲。呢間啲食物真係幾高質，所以到我兩點幾食完走嘅時候，成間餐廳都仲係滿座，其實都幾犀利。