吉吉魚蛋 (Closed)

美孚有三、四檔賣魚蛋腸粉既小販檔, 其中一間係橋底既<吉吉魚蛋>就最鐘意幫襯。魚蛋、燒賣、腸粉、雞蛋仔、格仔餅等, 選擇都幾多, 價錢都算合理, 買完可以企係側邊食。魚肉碗仔翅撈麵 $20 印尼撈麵底再加魚肉碗仔翅, 呢碗三溝真係不得之了, 勁邪惡, 但又勁好食!個碗塞到好實好滿, 撈勻都要小心d。 魚肉條既魚肉成分唔多, 粉亦唔算厚, 彈牙程度一般, 連埋醋, 麻油同胡椒粉食都算唔錯。 碗仔翅唔會好稀又唔會好稠, 做湯底岩岩好, 雖然料唔算多, 基本既雞肉絲、 粉絲、 木耳等都有, 味道好濃郁, 同印尼撈麵既調味粉撈勻就更加惹味, 撈麵唔會淥到好淋, 剛剛好既彈牙。 食完好滿足, 推介呢碗三溝!腸粉$8/4條 要左$16即係有8條, 好大盒, 腸粉好滑, 加埋甜醬同麻醬, 醬汁落得好重手, 雖然冇合益泰咁好食, 不過係美孚黎講已經叫好唔錯。魚蛋$7/6粒 冇加到惹味既辣醬因為怕辣。 魚蛋唔係發到大大粒個隻, 唔係爽口, 但結實又好有嚼口, 都唔錯。