麵麵 (Closed)

依家嘅我都會時不時幫襯主打健康飲食嘅餐廳，最近喺旺角就見到一間全港首創魚烏冬嘅專門店「麵麵」，佢嘅魚麵、魚烏冬、魚湯都具有豐富營養。咖喱吉列豬扒拌魚烏冬，咖哩濃香，味道微辣；吉列豬扒口感酥脆，皮薄肉厚，食落Juicy，配以美乃滋食用，口味更日式；魚烏冬口感煙韌Q彈，魚肉味道濃郁，忌廉嘅加入令魚烏冬有多一層Creamy嘅口感；每份套餐配有3款前菜，柚子汁大根味道清甜，口感爽口；甜蕃薯味道香甜，口感綿密；胡麻醬海苔，味道清新。薑汁燒鰻魚魚湯料理，鰻魚份量大，肉身厚實、魚肉滑嫩多汁，薑汁調味甜咸適中，鰻魚帶有些少薑辣，鮮味更突出；魚香麻辣湯惹味，但仍然飲到當中帶有魚嘅鮮味；3款前菜一式一樣都係包括有：柚子汁大根、甜蕃薯、胡麻醬海苔。流心蛋越南豆腐，流心蛋蛋味香濃，流心效果突出；豆腐非常嫩滑，越南醬汁酸酸甜甜、味道獨特；沙律有多款蔬菜，配以日式芝麻醬食用，味道更清爽。泡沫玫瑰奶茶，泡沫口感幼滑，奶茶濃厚嘅茶香中帶有淡淡嘅玫瑰香氣，味道微甜，唔會掩蓋左茶味、玫瑰味。凍愛爾蘭忌廉咖啡，雞尾酒款式之一，上層係厚厚嘅香滑忌廉，下層係加入威士忌甜酒嘅咖啡，咖啡飲落有另一浸果香，整體味道甜而香醇。