宏 (Closed)

同朋友去打保齡球先知道原來黃埔有新野食，係九號水產入面有好多高質日式餐廳。想食甜品又想食飯，所以就決定食宏啦。見到個迷你三彩丼有齊三樣我想食既野，仲有甜品同飲品，真係好吸引！一個套餐有齊鰻魚飯、吞拿魚蓉飯同海藻烏冬，真係超滿足！店員介紹可以加七味粉落烏冬，而鰻魚就可以加少少山椒。天氣太凍，所以我先食烏冬。烏冬同一般烏冬唔同，較為扁身，見到有一粒粒海藻係入面，口感扎實彈牙，味道好好，有種獨特既味道。而且湯底都好正，味道清香，配埋昆布同蔥花食真係一流。吞拿魚蓉魚生飯，吞拿魚蓉又夠肥美，入口即溶，魚味香濃，魚蓉同飯之間有一層碎紫菜，增加左成個飯既美味，又令人覺得吞拿魚蓉冇咁膩，十分有心思。冬天既主角，鰻魚飯出現了！見到咁厚切既鰻魚已經流哂口水，而且鰻魚散發住陣陣香味。鰻魚十分肥美，一入口就有豐富既油膩係口中爆發，仲有鰻魚醬汁既味道十分香濃，成個鰻魚飯都好好食，好幸福啊！仲有甜品綠茶小卷，真係高質，味道唔會過甜，有綠茶的甘香，忌廉好香好香，蛋糕好綿密，好食。飲品都叫左抺茶紅豆熱飲，熱飲有三層，上層係泡泡，中間係綠茶，下層係紅豆，綠茶甘香奶滑，又有大大粒又甜既紅豆，。